هز السهر

هز السهر ويطيح لك صوت وابيات
اللي زرعها في ظلامي غيابك

وجه الغياب اللي ملته الحكايات
راح ووقف من غيبتك عند بابك

كان الشجر يابس وفيه احتمالات
وكان الحجر شالك عليه وعتابك

غبت وجبرت القلب لاصعب خيارات
تشبه صعوبة رجعتك واقترابك

وقفت انادي بصمت وبصوت ما فات
لين اختفيت وصرت اطارد سرابك

وشلون ابجمعني وانا بعدك شتات
وشلون ابعرف وجهتي في ضبابك

ما دام حب فات في عداد الاموات
عسى العوض يا خافقي في شبابك

نحلم وتهدينا الليالي مسافات
ونمشي بها لين الدروب اتشابك

صار الشعور المختفي في النهايات
غصه بقلب اللي سكت ما حكى بك

امشي وعيني في رقاب البنايات
عل وعسى يقبل علينا سحابك

اللي بقا جرح صغير وروايات
ذهابها عن خافقي في ايابك

قدرت ازيلك من وجيه الصباحات
مير البلا فالليل كيف اجتنابك ؟

وجه الامل يشبه شعور البدايات
ووجه الالم يشبه زعلك وغيابك

حماه

اعذرينا وســــــــامحينا يا حماه

لا جلسنا وما حمــــينا لك حِمى

الكرامه شي تعشـــــقه الحـــياه

النظام الارض وانتي فالــــسما

ارسمي عزك على بيض الجباه

بالصمود وبالوقوف وبــ الدما

ما يدوم الظـــلم والظــــالم تراه

بيكتشف بانه بعد نصرك عمى

ما خبرنا طالت اعمار الطغاه

الرخا والغيث يســـــبقه الظما

ارموا الطاغي بشيً قد رمــاه

لا رميـــتوا ربنا معــــكم رما 

اســـماي

طاح الظلام ورافــــقه عازف الناي
واشتب عود وطـــــــاح رمح وقبيله

عشان اقول الحــــــق يا فاقد رضاي
اصبحت لعـــــــيون الجروح الدليله

تدحرجت قـــــــدام عـــــيني نواياي
واخذت سيف وصحت فوق الاصيله

من منطـــــلق بادل من يبادلك راي
ما جاك حِـــــــيله منك بيروح حِيله

لو بعترف لك يا الليالي وش اخطاي
كان استرحت وصرت حاجه جميله

يوم اني اكتب باسم واحد من اسماي
كانت لغـــــايه وبررت لي وســــيله

ما دار في بالي ولا كـان فــــ اجواي
غير الطــــــموح وحاجةٍ مستحيلة

بانت ملامح رغبــــــتي في محياي
خطوة وتقـــــصر كل رحلة طويله

بديت ارتبني واعـــــــدد وش اشياي
وقررت اغامر لاجل حـــــاجه نبيله

رميت في وجه الســــــواليف مركاي
وكشفت صــــدري لكل نسمه عليله

على كثر ما الشــعر مالي لي ارجاي
الا اني اكثر شخــــص ما يشتكي له

احاول ابعد عنه وازيــــــد في إقفاي
واقفي وكني متــــــجه واعــــدي له

نبضه وحــرفه مســــكنه في زواياي
وعقلي وقلبي مــــــثل اخوه وزميله

اصد واضعف وانهـــــمرله من اعلاي
وينبت على راســـــــــه زهور وجديله



الشعر مركب

الشعر مركب وانا له ريح
وامواج ويدين وشراعي

له مني الجهد والتلويح
وانه يجي لا دعا داعي

قليل لكن ماهوب شحيح
غزير ويبلل اسماعي

دامه نبت فالصدور الشيح
خذ ما تهيا من ابداعي

لو كان يكفي الهوى تلميح
ما كانت حروفي قناعي

ولو كان همي مناه اصيح
ما رافق الشعر اوجاعي

ولو كان جرحي مناه اطيح
ما كانت اوضاعي اوضاعي

شعري يقول اترك التلميح
واقول انا هذي اطباعي

خوف المشاعر من التجريح
وخوف الرعيه من الراعي

يا مبتسم لي تبي توضيح
ودي ولكن وش الداعي

مشيت عكس اتجاه الريح
ولا زالت اوضاعي اوضاعي



بين امرين

ترقـــــا على متن السواليف الاحلام
وترقــــــا على متن الشعور القوافي
وتبدي لنا معاناة الايام الاجسام
وترسم لنا وجه الجفاف الفيافي
الليل بين امرين يا اوهام يا الهام
اما رياض الحرف والا منافي
والهاجس اللي ما تركني ولا نام
لا هو تعب مني ولا قال كافي
مباني الضيقه على صدري خيام
اطنابها حدب الضلوع النحافي
دستور يا مركب سواليفنا العام
تبحر وانا لك فالغروب المرافي
هذا البحر دايم تعابيره انغام
صوته مزيج من اللقاء والتجافي
اخاطبه واعاتبه والهوى شام
واصير خطوه بين جرح وتعافي
لا قلت راح يقول واعده قدام
وان قلت فرقا قال ماهوب وافي
لو كل ما فيني تترجمه الاقلام
كان ابتعدت من التعب للتشافي
يزود حلم ولانقص غير الايام
ذنبً ولا احلى منه غير اقترافي
ما طال هم ولا بقى غير الاوهام
ضيقه وانا ادري تاليتها عوافي

 



واحشني !!

يا شـــعر واحشــــــني بقوه بقوه

مر الشـهر كله ولا قلت لي بيت

فقدت بغيابك شــــــعور الاخوه

كنــــي بدونك جد لا حي لا ميت

كل الكــــــلام الزين فيني مشوه

صارت عيوني شفتي لا تحاكيت

 

حتى ظـــــــلام الليل منزوع جوه

ان كنت جالس او ركبت وتمشيت

الشــــــعر ما يعرف غلاه وسموه

الا جروحٍ في خـــــــفوقي مفاليت

في حضرته انا السلـــــيط المفوه

اقطف من زهوره وانا ما تعديت

استعـــــجله وارجــيه وارقبه نوه

لبيه لا جــــاني على ما تمنــــيت

لو انـــــها بالعنـــــــجهه والفـتوه

كان امتــــلكته باختصار استبديت

يا شعر كيف تغــيب ماهيب خوه

تركتني وحدي وغبت وتمـــاديت

وصلت في جهدي مــــداه وعلوه

قناعتي مضــــمونها بعد هالبيت

الشــــعر مثل الحب ما فيه قوه

شي من الخلاق ينصـــاك ويبيت  

التمثال


لا زاد قـــدره ولا بعده نقـــص قدري
كـــف توادع وكـــف تهد تمــثاله

ما عــاد له في ســما دنـياي ما يغري
اقـــفاية وجـــيه كل راح في حـاله

يا مــقبل الغــيم هل شـوي في فكري
القــلب وده وطـــاري الشـعر في باله

خـذني من ارض التعب والواقـع المزري
لاقــصى مكــان خــيال الفكر يرقا له

سلاام

ســـلام يا خافي التـعبير في صـدري
ملت ضـــلوعي سـكوتك لا تجي عاله

اصــدح بخــافيك واللي ما درى يدري
اترك ذهب صــمتك القـــتال وظلاله

الصــدر مكشوف والطعـنات في ظهري
قل الكــفو في زمان كــثروا انــذاله

اهــديت الايام ما شحــيت في عمري
ولا قــلت فزعه يــهز الوقت فنـجاله

لهم طــبايع وانا لي طـبع من صغري
احــط عــيني بعين الصـعب واناله

يا ناقلــين الســوالف ما نفذ صـبري
ما زحزح الحــكي ضـلع طويق وجباله

هو من هو اللي بقى منــهم على خبري
النفس طــابت ما دام الوضـع يرثى له

إنهار قــدره وانا باقي على كــبري
جــاكم كلامي وقــولوا فلان ما قاله

مسرج المهره

مسرج المهره وكل طـــيب سرج
مهرته والارض مــــيدان رحيب

ليت هـــم القلب لامـــنه خرج
تبتعد شــمسه وترحل للمـــغيب

ماتضــيق الا وعــــند الله فرج
فارج الكـــربات سبــحانه قريب

بامره الأنـــــهار لامنــه مرج
تــلتقي بامره ويـــسهل له صعيب

فزعته تعنـــي لنـــا درب ودرج
ونقمته تعــني لنا جـــرف وشعيب

ربي ابــعدني عن كـــروب وحرج
ويالله انك لي لا تـــردي نـــصيب

فضفض الــــشاعر وعن همه هرج
الوقــــايه طب من خــاف الطبيب

توقيع

وجهتك معروفه وانا وجهتي غير
....................هذي هي الدنيا بـدايه وفـرقا
اوقات ما نحتاج للـــبعد تبرير
...................نظره تكفي عن سواليف غـرقا
يامبعده قولي تمســى على خير
..................وانا بقول لــباقي الدمع يـرقا
كنتي طموحي رقم 1 والاخيـر
.................والحين ما عادت سما الكون زرقا
يله نغني بصوت 1 مقاديـــر
.................مسكين يا قلب العنا ذقت فــرقا

لاجديد .. جده

لا جـــــديد وكل ما في الامر جده
اقـــتلوها ناس مـــعدومة ضمير
اتركوها في مـــهب الريــح مده
لين صـــار الغـيم مكروه وخطير
قالوا الخــــطوات دائم مســتعده
اه ياالخــــطوات والمنظر مـرير
كيف كانت كيــف صارت وش مرده
والله ان الــــقلب مـجروح وكسير
ياكبير الخــوف فــينا من يــهده
وياكـثير الـــلوم وش ذنب الصغير
كيــف نامت روســهم فوق المخده
والعــروس تصــيح ما تقدر تسير
يا الــيدين الخـــاينه يا المستبده
كيف سيـــف الردع مثلوم وضرير
ياعروس البــحر لاتــشكين شده
لو يطـــيح شداد ما طـاح البعير
(كان يا ماكان) والاحـــلام ورده
والامـــل بالله معــقود وكبـير
اصدق الكـــذبات يوم نقول جده
جده غير وجده غــير وجده غـير

كل حلم مرني !

كل حلمً مـــرني وقت العـــــتيم
ينبني مـــعه الامل ثم ينـــــهدم


ضاقت اخلاقي وانا طبعي حلـــــيم
في خفوقي نار ويـــــديني عــلم


كل طلــــقه مستقره فالـصميــم
خلت الشــاعر يــــبوح من الالم


وســـط قــلبي هم والله العظــيم
لو سكن جسم الصنم طـــاح الصنـم


لا نبح في وجـــه الاصحاب اللئـيم
القـــزم مهــما نبح يبقا قـــزم


والله ان الطـــيب في يدينا مقــيـم
زارعـينه فالرجـــال وفي الرمـم


يا عديم الوصف يا نـسل العــــديم
نبتـــتن ما تــنبت الا فالقـــمم


في جــــديد الوقت والا فالقــديم
ما تغـــيرنا ولا طـــاحت همـم


باذلين الجــــهد من قلب وصمــيم
والعــشم فاللي خلقنــــا من عـدم

الحشـــيمه لكل رجـــال(ن) حشيم
ما جحــــدنا قدر وافـــين الذمـم


خــطنا قـــدام دائم مستــــقيـم
لاجل عز الراس ما تتـــعب قـــدم


العقل ماهوب فالجــــسم الســـليم
العقل موجــــــود في راس وقلـم


من تجاريبي عرفــت ان الغـــشيم
من يقــــول افــهم وهوًه ما فهم


ما عرف قدر الكـــــريم الاكريـم
ولا جــحد فعل الكـــرام الا الجـزم

النعاس

ترى النعاس اللي غلب عينك وحــام
أثـًر على صـــوتك ونبرة كـلامك

يا اللي كسل جفـــنك تقاسيم وانغام
طول السهر يرهق مفاصل عظــامك

نامي عسى تنصــاك زينات الاحلام
اللي توسع خــــاطرك في منامك

ارمي ورا ظـــهرك معـاناة الايام
وابني على عـــشب التفاءل خيامك

ميـــعادنا يا عذبة الصــوت قدام
في حزةٍ فيـــها دواي ابــتسامك

انا لك الوافي على الخــــيل مقدام
لبى غـــــلاك وطيبتك واهتمامك

الصــادر من القلب لك شوق وهيام
واللي لـــفاه ومكسبه هـو غرامك

طبـــعي كذا يا بنت حزات الالهام
ما ارتاح لــين اقول شعري امـامك

فز الــشعر فيني ورزيت الاعــلام
وكتــبت شعرا يســتحق احترامك

الليل هيضني وانا مــعه فـ خصام
يا ليــل وش قيــمتك لولا ظلامك

عـليك بسم الله من اضـغاث الاحلام
اللي تعكر خــاطرك في منـــامك

حظ السماء

لو ماامطرت غيمه صدق غيرها غيوم
فاتت جروح القــــلب حزة برادك

اللي خفا في لحــظة الصمت معلوم
العين تكشف ما خــــفا من عنادك

وعيت من غيــبوبة الحب مصدوم
لا تنصدم يا قلب واخـــف ارتعادك

دنياك هـــذي بين فايز ومــهزوم
الناس قبـلك وانت تـوك وعــادك

راح الســـهر يا مبشر العين بالنوم
باوادع الليل الطـــــويل وسوادك

حظ السما لا طاح من صــدرها نجوم
ما قد خبرنا يا الســـما النجـم زادك

اخذي كلامي شــــعر صافي ومختوم
نيــته فرقا ولو يبيك اســـــتعادك

خسرت لعيــــونك مخــاليق بالكوم
ولو ما خسرتك خافقي ما اســــتفادك

عليك ما وقف شــــــعوري ولايوم
عندي تساوت جيــــــتك وابتعادك

وان كان ظــــنك بـــترجاك والوم
والله ان تبـطي ما تــــحصل مرادك

العام لك وضـــــعك مقـدر ومحشوم
واليوم بسرج يا المــــــفارق جيادك

ارحل وفارقني ولانيــــب مـــلزوم
هذي بلادي وانت ســـافر بـــلادك

مرايتك

الصـــــــباح اللي حسبت انه صباح
اثره جبـــــــينك عاكســــته مرايتك
شفت وجهك واحسب ان الليل راح
واثرني يا ســــــــــــيدي في بدايتك
انتـــظرتك لين دم الصـــــــدر فاح
كــــل ما كلـــمت قلـــــــــتي جايتك
لا تعاتبنــــــــي بنـــــــــقلبها مزاح
وببـــــــتســـــم لك قبل تبدا حكايتك
العتاب اللي مثل زرق الرمـــــــــاح
هالوســـــــيله ما تبــــــرر غايتـــك
خاضـــــع لك وانت ما تملك سلاح
وسط قلـــــــــبي راكزن لك رايتك
رفــرفت لك كـــــــل ما هبت رياح
دونــــــها راس ســـــــهر لحمايتك
وخلفها جيــــــش المشاعر فالبراح
جاهــــــــــزه وتقول وش هو فايتك
غيـــبـــــــتك تتعب وشوفتك ارتياح
والله اعـــــلم معي وش هي نهايتك
المبــــــــــاح من الشعور المستباح
مثل ما يكتــــب وعكـــــس قرايتك
يعني لو نقــــــــول كل الشوق باح
لازم انــــــــك تســــــــترد ولايتك
لامحـــــــاصرني ولا مطلق سراح
ما عــــــرفنا اقبــــــالك من اقفايتك
كل ما قلت الحــــــطب يا زين طاح
ترجع تـــمارس معــــــــاي هوايتك
كــــل شــــــي تمارسه ضدي مباح
لا تعــــــبت ولا خـــــــذيت كفايتك
لو يطيــــــر الطير من غير الجناح
كان والله يوم غبــــــــــــتي شايتك

ابريل

ماهــــيب والله كذبة ابريل يا ابريل
لا والله الا شـــــوف عين وحقيقه
قبــــــل الحقيقه كنت مغليه بالحيل
ومـــــن بعدها جعله يروح بحريقه
قطـــعت من يمه دروب ومراسيل
واصــبح طريقي ما يلاقي طريقه
لا للـــــخضوع اللي نتيجته تقليل
لاســمي ورسمي بين ناس وخليقه
وايه ونــــعم للعز والفوز والخيل
البــــحر واسع لا عبرنا مضيقه
سـاري واحب الليل يا خايف الليل
انا نديـــم اللـــيل وانا شقيقه
ارمـــي عليه هموم وارتاح ويشيل
ويقـول وش فيك انت واقول ضيقه
من كثـــر ما اشب السهر فالقناديل
تصــحى جروح في خفوقي عميقه
يا لايمي لو مـــالوا الناس ما ميل
لو اني اعــــاني وروحي غريقه
عيني تقز الــدرب ما احتاج دربيل
ورجلي تدوس الصـعب حره طليقه
مافيه فــــرصه للعذر فالمقابيل
وشلون اســامح من غدر في رفيقه
عطــيته من الوقت ما يجهد الحيل
ومـــثله خسـاره فيه حتى دقيقه

انا

انا لفتــــــــره مـــــن الفترات
كـــنت اعتــــــــبر نفسي الاول
اليــــــن مــــــره من المرات
تــــغيـر الوضـــــــع واتحول
اصعب شـــــــعور انــهزام الذات
والصــــبر بالــــــذات لا طوٌل
امـلـك خــــــــطاوي بلا وجهات
ياســـعود ابـــــــمشي وبتجوُل
لاصرت هـــــــــامه مع الهامات
الامــــــر في يـــــديك ومخوٌل
اللي رقى المـــــــــجد والصعبات
اللــــوم ينــــــــصاه لا حول
بــــذلـــــت جهدي لاجل رغبات
ماني مثـــــل غـــــيري اتسول
طلقــة تـــــــساوي عشر طلقات
لا صــــــــارت العشر من احول
والحــ ـــب غــــايه من الغايات
بعــــــدين والحـــــين ومنول
الحب مـ ـــاهو لــــكل من جات
الحــــــــــب الاول هو الاول